ന്യൂഡല്ഹി: റവ.ഡോ. സ്റ്റീഫന് ആലത്തറയെ ഭാരതത്തിലെ ലത്തീന് കത്തോലിക്കാ മെത്രാന് സമിതിയായ സി സിബിഐയുടെ ഡപ്യൂട്ടി സെക്രട്ടറി ജനറലായി നാലാമതും നിയമിച്ചു. 2030 വരെയാണ് പുതിയ കലാവധി.
ഭാരതസഭയുടെ ചരിത്രത്തില് ആദ്യമായാണ് നാലാം വട്ടം ഒരു വൈദികന് ഈ പദവിയിലെത്തുന്നത്. 2014ല് ഡപ്യൂട്ടി സെക്രട്ടറി ജനറാലായി ചുമതലയേറ്റ ഫാ. ആലത്തറയെ 2018ലും, 2022ലും 2026ലും മെത്രാന് സമിതി തുടര്ച്ചയായി നിയമിക്കുകയായിരുന്നു.
ഡല്ഹിയിലും ബംഗളൂരുവിലും ഗോവയിലുമുള്ള സിസിബിഐയുടെ കാര്യാലയങ്ങളുടെ ഡയറക്ടറായും അദ്ദേഹം തുടരും. 2007 മുതല് 2014 വരെ കേരള കത്തോലിക്കാ മെത്രാന് സമിതിയുടെ ഡപ്യൂട്ടി സെക്രട്ടറി ജനറലായിരുന്ന അദ്ദേഹത്തെ കെസിബിസിയും തുടര്ച്ചയായി മൂന്നുവട്ടം നിയമിച്ചിരുന്നു.
ഭാരത സഭയുടെ മിഷന് പ്രവര്ത്തനത്തെ സഹായിക്കുവാനുള്ള കമ്യൂണിയോ സ്ഥാപിച്ചത്, നിര്മിത ബുദ്ധിയുടെ കാലഘട്ടത്തില് സഭാപ്രവര്ത്തനങ്ങളെ ജനങ്ങളിലേക്ക് എത്തിക്കാനുള്ള കാത്തലിക് കണക്ടിന്റെ തുടക്കം, സിസിബിഐയുടെ പ്രസിദ്ധീകരണ വിഭാഗത്തിനായി ആര്ക്ക് ലൈറ്റ് ഗ്ലോബല് എന്ന കമ്പനിയുടെ ആരംഭം എന്നിവ ഫാ. ആലത്തറയുടെ കാലഘട്ടത്തിലാണ്.
സിസിബിഐയുടെ സെക്രട്ടറിയേറ്റുകളായ ഗോവയിലെ ശാന്തിസദന്, ഡല്ഹി ഫരീദാബാദിലെ ബഥാനിയ, ബാംഗ്ലൂരിലെ പോന്തിഫിക്കല് മിഷന് സോസൈറ്റിയുടെ പുതിയ ഓഫീസ് സമുച്ചയം, ന്യൂഡല്ഹിയിലെ നവീകരിച്ച സിസിബിഐയുടെ കേന്ദ്രകാര്യാലയം എന്നിവയ്ക്ക് ആരംഭം കുറിച്ചതും ഫാ. ആലത്തറയുടെ കാലഘട്ടത്തിലാണ്.
പതിനെട്ടിലധികം പുസ്തങ്ങളുടെ രചയിതാവായ ഇദ്ദേഹത്തിന്റെ, മതബോധന ശാസ്ത്രത്തിന് ഒരു ആമുഖം എന്ന ഇംഗ്ലീഷ് ഗ്രന്ഥം ഭാരത്തിലെയും വിദേശ രാജ്യങ്ങളിലും മേജര് സെമിനാരികളില് പാഠപുസ്തകമാണ്. വരാപ്പുഴ അതിരൂപത വൈദികനായ ഫാ. സ്റ്റീഫന് ആലത്തറ ആലുവ മരിയാപുരം ഇടവകാംഗമാണ്.
Deepika
E-paper LOGIN
LOGIN
